الموصلات ( ســــــــــواح)

 

 

في فيلم الفيل الازرق هند صبري كانت بتقول لكريم عبدالعزيز  "لا تخاف لكن احذر ", فانا انهارده جي اقولك لا تخاف برده بس ابكي يا عزيزي و يا عزيزتي علي صراع ركوب المترو كل يوم و الموصلات عموما.

انا كريم فوزي من قنطين محافظه القاهره اللي من سوء حظي فيها ان الموصلات مش ازمه فيها خالص, الموصلات هي اس الفساد و كل الازمات,

خلينا نصنف الموصلات 3 انواع .

1- النوع الاول و السهل الجميل... 

هي الموصلات الداخليه اللي بنستخدم فيها موصله تسمي بالعشه او المشروع او المكروباص, مسافات فيها قصيره بس الطبيعي ان اي موصله تاخد ساعه بالميت كده بدون ما تسألأ عمرك فيما افنيته, بتكون زي موصلات المعادي, السيده جيزة, شارع الهرم و فيصل, كل دي مسافات قصيرة و الموصله المفروض متخدش مسافه كبيرة

2- النوع التاني .. هو وقت تذكر حياتك و جلد الذات

بتكون موصله بين منطقتيتن بعاد بس طريق موحد, زي حلوان جيزة,  حلوان معادي, حلوان تحرير, حلوان عبور, حلوان السلام, طريق واحد تمتد مدته بالساعات و تحوطك اسئلة كتير فشخ اوي اوي, اللي ممكن تخلص 3 اجزاء قرأن و تشوف مسلسلين و ممكن تتعرف علي بنت و تتجوزها و تكونت هانت خلاص قربنا.

النوع ده من الموصلات يستلذ في الشتا لو الجو لطيف, و بتسب لنفسك لو الدنيا شتت و في مطرة, لكنه الافضل في الليل في اي وقت بالذات لو الطريق فاضي نسبا و معاك هاند فيري .

3- النوع التالت و سئ الذكر هو انك هتستخدم المترو 

فى بدايه ركوبى للمترو بحس بى 3 حاجات ....

1- اولها انى عاوز انط وامشى

2- انى مش عاوز اكون هنا

3-انى بكره نفسى 

نيجي لسؤال مهم ليه اهل القاهره بيكرهوا المترو ؟

الاجابه ... ان المترو سرك كبير و ده التجسيد الحقيقي لجمله الدنيا مسرح كبير.

فجأة و انت قاعد في امان الله تلاقي شخص قرر انه يبعلك لعبه اطفال, فيرحل فتلاقي غيره بيبعلك ولاعه, مش عاوز , هيجي اللي يبعلك ادوات مطبخ, مش عجبك, طيب يلا شربات بوكسرات , مولد كبير و للاسف بنكون احنا الارجوز بعد ما نشتري بضاعتهم